Eventos Canónicos da música galega. Parte 1. Siniestro Total

Sabías que hai un momento clave na historia da música galega que deu lugar á movida viguesa? Pois imos falar do Nadal Rock 1981.

Para poñernos en contexto, temos que viaxar á cidade de Vigo, ao Cine Teatro Salesianos, os días 26 e 27 de decembro de 1981. Nesas datas celébrase o festival Nadal Rock, onde participan bandas como Mamoa, Nacha Pop, ESEA ou Traballadores do Comercio. Pero o momento máis importante dese festival é o primeiro concerto dunha banda que estaba chamada a cambiar todo: Siniestro Total.

Naquel momento, Siniestro Total estaba formada por Julián Hernández, Germán Coppini, Miguel Costas e Alberto Torrado. Pero como pasa con todas as células, esta tamén se dividiu e multiplicou, creando novas bandas que serían clave na movida galega e máis aló.

Por exemplo, Germán Coppini fundou Golpes Bajos; Miguel Costas formou Unión Penosa; e Alberto Torrado pasou a tocar con Os Resentidos. Este fenómeno de ‘endogamia musical’ deu lugar a máis bandas, como Los Cafres, e nos anos 90 a influencia da movida viguesa acabou xerando grupos como Killer Barbies ou Los Piratas.

Todo isto comezou co primeiro concerto de Siniestro Total no Nadal Rock de 1981, un evento que podemos considerar un auténtico punto de inflexión na historia da música galega, un momento canónico que sementou o que viría despois. Sen ese concerto, a historia sería moi distinta.