Garbage despídese en Galicia cun concerto o 6 de xullo na Sala Pelícano

O 6 de xullo A Coruña acollerá unha desas citas que conectan memoria e presente. Garbage actuará na Sala Pelícano dentro da programación de O Gozo Festival 2026, nunha das tres únicas datas que a banda ofrecerá no Estado e como parte da súa xira de despedida.

A traxectoria do grupo liderado por Shirley Manson marcou unha forma de entender o rock alternativo dos noventa, combinando distorsión, electrónica e pulsión pop cunha personalidade moi definida. Cancións como “I Think I’m Paranoid” ou “Only Happy When It Rains” forman parte do imaxinario colectivo dunha xeración que medrou coa MTV acesa e co alt-rock como banda sonora emocional.

O seu último traballo, Let All That We Imagine Be The Light, naceu dun momento delicado. En 2024, Manson tivo que deter a xira anterior por unha lesión que a obrigou a parar. Durante a recuperación, a banda construíu cancións a distancia, compartindo ideas e texturas que acabaron converténdose nun disco atravesado pola vulnerabilidade, pola conciencia do tempo e pola necesidade de seguir creando.

As entradas sairán á venda o luns 16 de febreiro ás 10:00 horas nas canles habituais, cun prezo de 45 euros máis gastos de distribución. As preventas comezan o 13 de febreiro.

O paso de Garbage pola Sala Pelícano será, seguramente, unha noite de reencontro. Unha oportunidade para despedir en directo unha banda que formou parte da educación sentimental de moitas persoas e que chega a Galicia nun momento de balance e celebración.