Álex Cassen revive o Vigo nocturno en “La Galia y el Galerna”

Vigo, 2016. Unha cidade que ardía de madrugada entre guitarras, luces baixas e conversacións que parecían eternas. Ese escenario emocional é o que recupera Álex Cassen en “La Galia y el Galerna”, o novo adianto do seu primeiro álbum.

O artista vigués, que iniciara o seu percorrido creativo coa poesía en Golondrinos (2022) e Algia (2023), leva tempo trasladando esa pulsión ao terreo musical. Tras o EP debut Las Cartas Sobre la Mesa (2025), segue a construír un universo onde a electrónica dialoga co pop e co rock sen pecharse en etiquetas.

“La Galia y el Galerna” pon o foco nunha xeración que medrou entre locais xa míticos da cidade olívica. A canción fala dos espazos que sostiveron amizades, amores, descubrimentos e primeiras despedidas, pero que non acaba de ser o seu lugar. Hai nostalxia, mais tamén desasosiego. O pasado aparece como un territorio vivo, que continúa influíndo no presente.

A nivel sonoro, Cassen mantén o gusto polas melodías directas e recoñecibles, cunha produción que acompaña o relato sen recargalo. O resultado é unha peza que conecta dende a experiencia persoal, mais abre portas para que cada quen recoñeza as súas propias noites, os seus propios lugares.

Este novo sinxelo súmase a “Culpable” como adianto dun álbum que verá a luz a finais de ano. Un proxecto co que Álex Cassen parece decidido a consolidar unha voz propia dentro da escena galega actual, combinando honestidade narrativa e ambición sonora.