Karmento, Mondra e El Nido xuntan territorios en “subir subir”

A manchega Karmento, o galego Mondra e os burgaleses El Nido comparten por primeira vez unha peza que dialoga co folclore dende o presente, sen maquillalo nin convertelo en postal.

O tema “subir subir” xa está dispoñible en plataformas dixitais e chega acompañado dun videoclip dirixido por Daniel Pérez, gravado en Cualedro. O escenario non é casual: a canción funciona tamén como lembranza e xesto cara ás persoas e ás paisaxes afectadas polos incendios que arrasaron monte galego o pasado verán.

A composición constrúese como unha balada que medra en intensidade, case como un mantra arredor da pulsión por avanzar. Esa idea de ascenso constante, de esforzo e de meta difusa, atravesa a letra e a interpretación. Hai unha reflexión sobre o movemento continuo, sobre o corpo que insiste, que para, que volve coller aire. E tamén sobre esa pregunta que ás veces paraliza: cara a onde estamos subindo.

A nivel sonoro, a canción vai gañando corpo ata desembocar nun tramo final máis lúdico e expansivo, onde entra en xogo El Nido e se crea un diálogo coral que amplía o horizonte da peza. O resultado semella un tríptico onde cada proposta conserva a súa identidade, mais comparte unha mesma raíz, entendendo o folclore como espazo vivo, permeable e conectado co agora.

Karmento, recentemente recoñecida co Premio Nacional de Folclore ‘Juan Cañí’, continúa así unha etapa na que reivindica o neofolclore dende unha ollada propia. Pola súa parte, Mondra segue consolidando un discurso no que tradición e contemporaneidade conviven con naturalidade. El Nido achega a súa lectura castelá, reforzando esa idea de que o mapa sonoro peninsular pode dialogar sen fronteiras nin xerarquías.