Noia abre “Un salón propio”, un ciclo de concertos que sitúa a creación feminina no centro cada domingo de marzo

O salón de actos do Liceo de Noia converterase durante este mes de marzo nun espazo de escoita próxima, palabra compartida e música en pequeno formato coa chegada de Un salón propio, un ciclo de concertos impulsado arredor do 8M que pon o foco na creación feminina e na necesidade de seguir xerando lugares propios para a cultura.

A programación desenvolverase cada domingo ás 19.30 horas, cunha proposta que bebe da idea dunha habitación propia formulada por Virginia Woolf: un lugar simbólico e real dende o que crear, pensar e ocupar espazo. Aquí esa idea tradúcese nun formato íntimo, pensado para descubrir e compartir a música dende outra proximidade, afastada do ruído e das dinámicas máis aceleradas do consumo cultural.

Abrirá o ciclo este 8 de marzo Su Garrido Pombo, que presentará o seu traballo Patios de luz, un proxecto no que as veciñas, a comunidade e os espazos comúns funcionan como eixo narrativo e emocional. O 15 de marzo será a quenda de Abril, mentres que o día 22 chegará Catuxa Salom, unha das voces que mellor está dialogando entre raíz e presente dentro da escena actual.

O peche terá lugar o 29 de marzo con Faia, que levará ata Noia Alvela, un traballo recente que continúa consolidando unha traxectoria marcada pola delicadeza interpretativa e pola capacidade de conectar tradición, memoria e contemporaneidade.

As portas abriranse ás 18.45 horas en cada unha das sesións, e as entradas, xunto cos abonos para todo o ciclo, están dispoñibles a través de Ataquilla. Máis alá da programación concreta, Un salón propio deixa tamén unha imaxe pouco habitual e necesaria: catro domingos seguidos nos que o centro non está só nos concertos, senón na forma de habitar culturalmente un espazo con tempo, atención e sentido.