Scarecröw reforza o seu momento de crecemento con Spread Your Wings, un videoclip gravado entre A Coruña e Oleiros

A banda coruñesa Scarecröw continúa ampliando o seu percorrido cunha peza audiovisual que tamén funciona como declaración de identidade. O grupo publicou o videoclip de “Spread Your Wings”, unha das cancións incluídas no seu EP II, editado en xullo de 2025, nun momento no que o proxecto segue consolidando presenza en directo e ampliando calendario fóra de Galicia.

A gravación realizouse entre distintos puntos da Coruña e arredores, incorporando tamén imaxes da costa e da contorna do faro da Torre de Hércules, que aparece na parte final do vídeo como unha imaxe moi recoñecible dentro do relato visual. O videoclip contou coa colaboración de Exeria Produccións, da Aula do Mar, do Concello de Oleiros e do CIFP Imaxe e Son, entidades que fixeron posible unha produción que para o grupo ten tamén un valor especial ao tratarse do seu primeiro traballo audiovisual deste tipo.

Scarecröw está formado por Carlos Barreiro na voz, Luis Diz á guitarra principal, Ernesto Montero á guitarra, Ramón Diz á guitarra rítmica, Roberto Pazos na batería e Diego Freire ao baixo. Unha formación ampla que aposta por un Hard Rock Metal de pegada clásica, pensado para funcionar con intensidade en directo e cunha lectura moi ligada ao formato de banda.

Ese avance coincide cun momento de impulso para o grupo, que en 2025 foi recoñecido como mellor banda local na XXVIII edición do concurso de bandas e solistas de CUAC FM, un certame que continúa sendo unha referencia para detectar proxectos emerxentes na cidade.

No plano escénico, a súa xira mantense activa nas próximas semanas, con parada o 14 de marzo no TronkoBar de Pontevedra, o 28 de marzo na Sala Bola B de Grijón e o 11 de abril en La Xana del Torío en Pedrún del Torio (León), ademais doutras datas aínda pendentes de confirmación.

A sensación é a dun grupo que vai sumando capas pouco a pouco: primeiro o disco, despois o recoñecemento local, agora unha peza audiovisual que amplía presenza e reforza imaxe nun momento no que moitas bandas emerxentes precisan precisamente iso, construír relato ao tempo que fan camiño escenario a escenario.