Dani Cornes publica “NVTQA” e achega un pouco máis o lanzamento de Aquí sempre tes casa

O pasado 30 de xaneiro viu a luz “NVTQA” (“Non vos tedes que alarmar”), o terceiro adianto de Aquí sempre tes casa, o novo disco de Dani Cornes. Antes chegaran “Arredor de ti”, en abril de 2025, e un segundo avance publicado en xullo do mesmo ano. O proxecto foi medrando con calma, deixando espazo entre lanzamentos, xerando expectativa. A sensación é clara: o disco está a facerse agardar e hai moitas ganas de escoitalo completo.

“NVTQA” afonda na distancia emocional dende unha óptica xeracional, cun lirismo contido que medra coa produción de Crnds, responsable de todo o álbum. A canción constrúe unha atmosfera envolvente, onde as guitarras e a distorsión se expanden sen perder delicadeza. Esa maneira de traballar o espazo sonoro conecta coa épica emocional e textural de M83, mentres que a sensibilidade íntima e contemporánea sitúa a Cornes nunha liña próxima a pablopablo: artistas que entenden a canción como un territorio vulnerable e coidado ao detalle.

Aquí sempre tes casa xirará arredor do arraigo, da identidade e dos vínculos afectivos. A migración xeracional aparece como experiencia compartida, tratada con honestidade e sen subliñados innecesarios. A casa funciona como símbolo e como refuxio, como lugar físico e como memoria.

No disco colaboran músicos de referencia da escena galega como Paula Rego (Agoraphobia), Gustavo Rey (Mascada) e David Castro, achegando capas e matices a unha proposta que destaca pola súa cohesión artística. A dimensión visual tamén ocupa un papel central no proxecto, coherente coa formación audiovisual de Dani Cornes, algo que xa se percibiu no videoclip de “Aquí sempre tes casa”, dirixido por Ariadna Cordal.

Cornes vai construíndo unha identidade propia dentro da escena galega, mesturando pop e sonoridades contemporáneas cunha lírica introspectiva. Agora, tras meses de adiantos espazados no tempo, o disco completo preséntase como un dos lanzamentos máis esperados do ano. A espera está a piques de rematar.