Nove salas galegas formarán parte da nova Red de Salas impulsada por ACCES

Galicia contará con nove espazos dentro da nova Red de Salas, un circuíto estatal promovido por ACCES (Asociación Cultural Coordinadora Estatal de Salas privadas de música en directo) que reunirá a 93 salas de concertos de todo o país co obxectivo de reforzar a programación de música en vivo e favorecer a diversidade artística.

Entre os espazos seleccionados atópanse a Mardi Gras da Coruña, a Rebullón de Mos, a Casa das Crechas e a Capitol de Santiago de Compostela, A Pousada da Galiza Imaxinaria de Boiro, o Club Clavicémbalo de Lugo, o Café Cultural Auriense de Ourense, A Arca da Noe de Vilar de Santos e a Krazzy Kray de Cambados.

O programa, desenvolvido en colaboración coa Dirección General de Artes Escénicas y Música, busca fortalecer unha rede de espazos que resulta fundamental para o desenvolvemento da música en directo. Durante os próximos meses, as salas participantes acollerán unha programación continuada que dará cabida tanto a artistas emerxentes como a propostas consolidadas, favorecendo a conexión entre escenas locais, estatais e internacionais.

A selección realizouse a través dun proceso de avaliación que tivo en conta aspectos como a traxectoria das salas, a calidade artística da súa programación, o seu impacto social e a súa contribución ao tecido cultural dos seus territorios.

Máis aló das cifras, a presenza destas nove salas galegas pon o foco nunha realidade frecuentemente esquecida: boa parte da vida musical constrúese lonxe dos grandes recintos e dos festivais multitudinarios. As salas de concertos continúan sendo os lugares onde nacen novas propostas, se consolidan carreiras e se crea comunidade arredor da música durante os doce meses do ano.

Nun contexto no que a atención adoita concentrarse nos grandes eventos, iniciativas como Red de Salas reivindican o papel destes espazos como unha das infraestruturas culturais máis importantes para a saúde e diversidade da escena musical.