Os I Premios da Industria Musical de Galicia revelan as súas gañadoras e gañadores nunha gala que celebra a forza do sector

A primeira edición dos Premios da Industria Musical de Galicia, impulsados por AGEM co apoio da Xunta de Galicia (a través da Agadic) e da Deputación da Coruña, celebrouse este xoves 27 de novembro na Sala Capitol de Santiago de Compostela. Un encontro sectorial concibido para reunir á cadea de valor da música en Galicia e recoñecer aqueles proxectos, profesionais e iniciativas que están a transformar o sector desde a creatividade, a innovación e a sustentabilidade.

A xornalista pontevedresa Tamara García Romero foi a encargada de presentar a gala, nun ambiente próximo e celebrativo no que tamén participou Señora DJ, responsable da sesión que puxo o ramo final á noite.

Un encontro moi agardado polo sector

A gala naceu con vocación de recoñecemento, pero tamén como unha oportunidade única para que profesionais que habitualmente só coinciden traballando —a correr, entre montaxes, probas de son ou axendas imposibles— puidesen verse, falar e compartir espazo dun xeito distendido. Para moitas das persoas nominadas e premiadas, esta primeira edición converteuse nun verdadeiro día de celebración: un momento no que a industria galega puido parar, mirarse á cara e agradecerse mutuamente o esforzo colectivo que hai detrás de cada concerto, cada xira e cada proxecto.

Gañar ou non gañar quedou nun segundo plano fronte á alegría sincera do reencontro, nun clima de comunidade que poucas veces se pode dar no resto do ano debido ao ritmo de traballo do sector musical.

Un xurado diverso para unha industria diversa

O xurado estivo composto por profesionais da música, da comunicación cultural, da produción, da sustentabilidade e do emprendemento creativo: Anxela Baltar, Cecilia Carballido, María Baqueiro, Tito Lesende, Javier Becerra, a Fundación Paideia e, un servidor, Noel Turbulencias. A nosa misión foi propoñer candidaturas e elixir as persoas finalistas e gañadoras en 14 categorías.

A maiores, a Xunta Directiva de AGEM designou dous recoñecementos especiais e o público escollería un último premio mediante votación popular.

GAÑADORAS E GAÑADORES DOS I PREMIOS DA INDUSTRIA MUSICAL DE GALICIA

14 categorías outorgadas polo xurado profesional

– Mellor deseño de iluminación: Teresa Tresandí, por DILUVIO, de Tanxugueiras.

– Mellor implementación de son: Iago Blanco, por La máquina del buen rollo, de The Rapants.

– Mellor empresa provedora de servizos: Vacaline.

– Mellor profesional de produción: Xabi Carnota.

– Mellor manager: Kin Martínez.

– Mellor produción discográfica: Juan de Dios, por Feira, de De Ninghures.

– Mellor posta en escena: Marina Oural e Ugia Pedreira, da Oficina Galega de Outros Asuntos do Movemento, por Síntese horizonte, de Guadi Galego.

– Mellor promotor/a-programador/a: Julio Gómez e Luis Campos, de Sinsalaudio.

– Mellor proxecto de comunicación: Bring the Noise, polo Resurrection Fest Estrella Galicia.

– Mellor identidade visual: Lara Caeiro, Sandra Montero, Noemí Solla, Kika V Ramil, Arantxa Brandón e Fillas de Cassandra, por Hibernarse, de Fillas de Cassandra.

– Mellor videoclip: Santi Iglesias, Sergio “Steel” e Fillas de Cassandra, por Hibernarse, de Fillas de Cassandra.

– Mellor evento cultural/musical: Surfing the Lérez.

– Mellor espazo musical: Sala Capitol.

– Mellor proxecto de sustentabilidade: Festival de la Luz.

Recoñecementos especiais de AGEM

– Artista do ano: Carlos Ares.

– Persoa do ano: Francisco Gómez “Gandy”.Premio por votación popular

– Excelencia na experiencia do público: Surfing the Lérez.

Unha iniciativa para reforzar o tecido musical galego

A presidenta de AGEM, Patricia Hermida, destacou na súa intervención que “a música galega vive un momento de madurez e diversidade extraordinarias”. Estes premios nacen para agradecer o traballo e o compromiso das persoas que sosteñen o crecemento da industria musical en Galicia e para visibilizar exemplos de boas prácticas que impulsan o avance colectivo do sector.

Os galardóns inscríbense no marco do Plan Estratéxico da Industria Musical de Galicia, impulsado por AGEM e apoiado pola Xunta, como unha ferramenta para fortalecer o sector musical como motor cultural, social e económico.

Sobre AGEM

A Asociación Galega de Empresas Musicais representa desde 2007 ás produtoras, promotoras, managers, editoras, compañías de representación e empresas técnicas que conforman a cadea de valor da música ao vivo en Galicia. Traballa con artistas e festivais en Galicia e no exterior, impulsando un impacto económico que supera os 100 millóns de euros.

O nacemento destes primeiros premios reforza o seu papel como entidade vertebradora dunha das industrias culturais máis dinámicas e creativas do país.