Silee transforma o éxito viral de “Milajros de Amil” na cumbia íntima de “Orballo”

Silee atravesa un dos momentos máis importantes da súa traxectoria. Despois de colocar “Milajros de Amil” no posto 18 da lista das 50 cancións máis virais de España en Spotify, o artista bueuense publica “Orballo”, un novo sinxelo que funciona como celebración, pausa e exercicio de honestidade emocional.

A canción chega nun contexto de crecemento evidente para o proxecto. “Milajros de Amil” camiña xa cara ao medio millón de reproducións e converteu a Silee nun dos nomes máis comentados da música en galego deste 2026. O tema entrou nunha lista compartida con artistas internacionais como Quevedo, Olivia Rodrigo, The Chemical Brothers ou Michael Jackson, facendo de Silee o terceiro artista que consegue introducir unha canción en galego nesa clasificación este ano, despois de LG1DO e The Rapants.

“Orballo” recolle precisamente ese instante de cambio. A través dunha cumbia construída dende a autoprodución, Silee abre unha fiestra aos seus medos, á súa perseveranza e á sensación de estar vivindo algo difícil de asumir en tempo real. A canción nace como un agradecemento a todas as persoas que acompañaron o seu camiño dende o principio, mais tamén como unha maneira de deter o ruído arredor do éxito para escoitar o que queda dentro.

O proceso creativo reforza esa dimensión artesanal e persoal. O propio artista construíu a base empregando un garfo e un prato, aos que sumou sintetizadores ata atopar unha textura que lle abriu o camiño á letra. Primeiro chegou a música, logo a emoción. Ese xesto define a intuición case doméstica, a procura rítmica e unha maneira moi propia de levar xéneros como a cumbia ou a bachata cara ao seu territorio.

O lanzamento chega acompañado dun videoclip dirixido polo propio Silee e gravado entre Bueu e Aldán por Ángela Gestido, Christian Arcos e el mesmo. A peza audiovisual continúa esa vontade de construír un universo propio dende preto, coa vila e a contorna como parte activa da identidade do proxecto.

Dende os seus comezos en 2023, Silee publicou dous EPs e un álbum, consolidando unha traxectoria marcada pola inquietude creativa e pola autoprodución. Agora prepara un novo traballo discográfico en galego, previsto para este ano, do que xa coñecemos “Milajros de Amil”, “Bruxa Curuxa” e este novo “Orballo”.

Nun momento no que a música en galego está atopando novas formas de circulación, especialmente entre públicos novos e espazos dixitais, Silee aparece como unha das voces que mellor entende esa conexión entre raíz, frescura e linguaxe contemporánea. O seu éxito non nace só dunha viralidade puntual, senón dunha maneira de facer que mira cara adiante sen perder de vista o lugar dende o que parte.