Arrhythmia anuncia as primeiras datas da xira de salas de CERØ, un paso cara ao directo máis cru e próximo da banda

Arrhythmia acaba de anunciar as primeiras datas da súa nova xira de salas arredor de CERØ, confirmando o momento de consolidación dunha das propostas máis intensas e contundentes do metal alternativo galego actual. A banda pasará pola Sala Masterclub de Vigo o 16 de outubro, pola Sala Malavida da Coruña o 21 de novembro e pola Sala Clavicémbalo de Lugo o 18 de decembro.

Arrhythmia aposta por levar o seu universo a espazos máis pequenos e inmersivos. A propia banda definiu estes concertos como actuacións “diferentes aos de festival para vivilos con vós de preto”.

A xira servirá, tralo paso por diversos festivais, como carta de presentación de CERØ, un traballo que continúa afondando nesa mestura de metal moderno, electrónica, escuridade estética e pulsión emocional que caracteriza o proxecto. Un son que bebe tanto do impacto visual e conceptual das escenas contemporáneas como dunha necesidade moi visceral de canalizar rabia, ansiedade e enerxía.

Arrhythmia segue apostando polo concepto de grupo, pola construción dunha identidade sólida e pola experiencia do directo como espazo central da súa proposta. E precisamente as salas parecen o lugar ideal para entender todo iso sen filtros nin distancia.

As entradas xa están dispoñibles.