Apolo18 recompilan os seus primeiros adiantos en Intentos de facer vida confirmando o seu lugar entre as novas voces do rock galego

Durante os últimos meses, Apolo18 foron deixando pistas do que estaba por chegar. O quinteto coruñés foi publicando cancións ao longo de 2026 e construíndo unha expectación pouco habitual para unha banda tan nova. Agora todas esas pezas conflúen en Intentos de facer vida, un EP debut que incorpora tamén o tema «Outono (Cabra)» e que confirma as sensacións que viñan deixando os seus primeiros lanzamentos.

Hai algo especialmente rechamante na proposta de Apolo18. Nun momento no que boa parte das novas bandas parecen mirar cara outros territorios sonoros, eles decidiron afondar no legado do rock alternativo dos 90 para construír unha identidade propia. Nas súas cancións poden aparecer ecos de My Bloody Valentine, Sonic Youth, Slowdive, Slint, The Jesus & Mary Chain ou Melvins, pero tamén unha conexión evidente con referentes máis próximos como Triángulo de Amor Bizarro e toda esa escena nacional que entende a distorsión como unha ferramenta expresiva máis.

O máis interesante de Intentos de facer vida non son tanto as súas referencias como a maneira na que as utiliza. A maior parte das cancións nacen dende melodías introspectivas, fráxiles por momentos, case como pequenas baladas que avanzan en tensión constante. Todo parece empurrar cara un punto de ruptura que acaba chegando inevitablemente en forma de guitarras saturadas, ruído e unha intensidade que desborda os límites da propia canción. Esa capacidade para converter a contención en explosión é probablemente unha das grandes virtudes do grupo.

Ao longo dos seus case trinta minutos, o EP transmite unha sensación pouco frecuente: a de estar escoitando unha banda que entende perfectamente os códigos do son que admira pero que non se limita a reproducilos. Hai personalidade, ambición artística e, sobre todo, unha frescura difícil de atopar nunha escena onde cada vez resulta máis complicado sorprender.

Apolo18 veñen ademais de ser nomeados aos Premios Martín Códax da Música Galega na categoría de Mellor Artista de Rock e afrontan nas próximas semanas algúns dos seus primeiros festivais destacados, con actuacións no Aquí Tamén Se Fala, Noites do Porto e Río Verbena.

Queda moito camiño por diante e moitas cousas por demostrar. Pero Intentos de facer vida deixa unha impresión difícil de ignorar, marcando os primeiros pasos dunha banda que xa comeza a ocupar un lugar propio dentro do novo rock galego.