Noites do Porto adiántase ao verán e amplía horizontes: unha nova etapa para un festival que quere ser cidade

A Coruña entra en 2026 cun movemento significativo no seu mapa cultural: Noites do Porto muda de datas e convértese na primeira gran cita musical do verán herculino. Un xesto que non é só estratéxico, senón tamén simbólico. O festival organizado por MASGALICIA bota o áncora na cidade coa intención de reforzar ese vínculo co tecido cultural que o converteu, en apenas cinco edicións, nunha das propostas máis singulares do panorama galego.

A nova edición arrancará o 22 de xuño, coincidindo coa antesala da noite de San Xoán —declarada Festa de Interese Turístico Internacional— e prolongarase até o 15 de xullo. Serán quince días de actividade nos que o festival promete manter os piares que o definiron desde 2021: eclecticismo, programación de calidade, directos únicos e o gusto polo descubrimento. A aposta non é menor: novos espazos, máis contidos e cápsulas ampliadas para crear un diálogo cada vez máis estreito entre música, creación e cidade.

Este cambio de datas sitúa a Noites do Porto nunha posición relevante dentro da carreira dos festivais urbanos. Nun contexto no que a industria adoita priorizar grandes marcas e macroeventos, a cita coruñesa insiste nun modelo que xoga a favor do territorio: activar salas, conectar disciplinas, colaborar con artistas locais e acompañar ao público nun percorrido diverso, propio e recoñecible. É unha forma de reivindicar que os festivais tamén poden ser ferramentas para fortalecer ecosistemas culturais, e non só para ocupar calendarios.

O anuncio chega tras un quinto aniversario especialmente exitoso: nove xornadas, 21 artistas e 15 espazos repartidos pola cidade; colaboracións gastronómicas con Os Tigres e Rosmón Burger; unha cápsula artística específica —Noites coa Arte—; dúas exposicións e mesmo unha presentación sorpresa con firma de discos. Unha edición que non só consolidou o seu carácter, senón que tamén lle valeu ao festival a nominación a Mellor Evento Cultural/Musical na primeira convocatoria dos Premios da Industria Musical en Galicia impulsados por AGEM.

Con esta sexta edición, Noites do Porto non dá un xiro: afonda. Amárrase máis á Coruña, á súa vida cultural e ao seu público, reforzando a idea de que un festival pode ser un espazo de encontro real para unha cidade, non un escaparate. E iso, nun ecosistema tan competitivo e acelerado como o da música actual, xa é unha declaración de intencións.