Rata confirma dúas datas en Galicia dentro da súa xira estatal por salas, ademáis do seu paso polo Osa do Mar

A banda murciana Rata suma Galicia ao seu percorrido coa segunda parte da súa Borrachos Tour, cun dobre paso por Vigo e A Coruña que funcionará como única oportunidade de velos en salas na comunidade. O grupo actuará o 2 de outubro na La Fábrica de Chocolate e o 3 de outubro na Mardi Gras, consolidando así o seu momento de expansión nun ano clave para o proxecto.

A formación, integrada por Dani Sabater e Félix Esteban, chega con No Me Quiero Morir Nunca, o seu primeiro longa duración. Un disco que se move nun territorio directo e sen filtros, onde o pop máis inmediato se cruza cunha enerxía rock que busca impacto máis que ornamento. Hai algo de impulso vital nese son, unha maneira de canalizar a intensidade dende o ruído e a emoción, que conecta con boa parte dunha xeración que medrou entre guitarras distorsionadas e ansiedade contemporánea.

O crecemento da banda tamén se le no contexto. A súa presenza en carteis como FIB, Mallorca Live, Cruïlla ou Cooltural fala dun ecosistema que tende a absorber rapidamente os proxectos emerxentes que funcionan en directo. Neste caso, Rata parece estar atopando o seu espazo dende esa honestidade sonora, nun circuíto onde a velocidade coa que se consome a música non sempre permite sedimentar propostas con identidade.

A xira, que xa alcanza arredor de 40 datas, terá tamén parada no Osa do Mar (Burela), ampliando así o seu paso por Galicia máis alá das salas.

As entradas para os concertos de Vigo e A Coruña xa están dispoñibles a un prezo de 16 euros.