O Revenidas suma músculo e identidade ao seu cartel cun segundo avance marcado pola diversidade

Vilaxoán de Arousa segue collendo forma de punto de encontro. O Revenidas, que celebrará a súa próxima edición do 10 ao 13 de setembro, presenta unha nova tanda de artistas que amplía o mapa sonoro do festival sen perder ese pulso comunitario que o define dende hai anos.

Nesta segunda entrega aparecen nomes que dialogan con distintas xeracións e escenas. El Drogas achega esa memoria viva do rock estatal construída a base de estrada e resistencia. La Gossa Sorda deixa unha cita única en Galicia dentro da súa xira, convertendo o paso por Vilaxoán nun deses momentos que se gardan máis alá do cartel. No plano máis próximo, The Rapants continúan consolidando o seu presente como unha das propostas máis recoñecibles da escena galega actual.

O cartel tamén abre a mirada cara fóra. Sara Hebe trae ese rap frontal que entende o escenario como lugar de posicionamento, mentres The Salsa Punk Orkestra xoga coa memoria do punk para levalo a un terreo festivo, pensado para o baile.

Todos eles únense a un primeiro avance no que xa estaban nomes como Evaristo Páramos, Rebeliom do Inframundo, Kumbia Queers, Ilan Amores, Arrhythmia, Süne e Nadie González.

O Revenidas segue construíndo un cartel onde a música funciona como espazo de encontro entre linguas, discursos e formas de entender o directo. Nun contexto onde moitos festivais tenden á uniformidade e á repetición de fórmulas, aquí mantense esa vontade de mestura que segue a conectar coa xente.