Os Premios Martín Códax da Música xa teñen finalistas para a súa XIII edición

A terraza das Bodegas Martín Códax acolleu este mércores a tradicional festa de finalistas dos Premios Martín Códax da Música, unha das citas que mellor retrata o estado actual da música galega. A gala final celebrarase o vindeiro 27 de maio no Pazo da Cultura de Pontevedra e reunirá os proxectos escollidos entre as diferentes categorías musicais e profesionais.

Nesta edición, o tribunal profesional estivo formado pola pianista e investigadora María Domínguez, a artista Rumia, o guitarrista Isidro Otero, o xornalista Luis Pardo e a xestora cultural Marta Horjales. Deles saíu unha selección que volve amosar a diversidade estilística da escena galega contemporánea, dende o folk e a tradición ata a electrónica, o metal ou as músicas urbanas.

Entre os nomes finalistas destacan propostas xa consolidadas como Galician Army, Antía Muíño, Broken Peach, Lamatumbá, Loita Amada, Hugo Guezeta, Stoned at Pompeii, Kike Varela, María Toro ou Nadadora, xunto a proxectos emerxentes que levan tempo abrindo espazo na nova escena como Lumedollop, Zeltia Irevire Abril, Alana ou Apolo18.

A categoría de pop e indie deixa unha das fotografías máis simbólicas desta edición coa presenza de Nadadora, un nome clave para entender parte do indie galego das últimas décadas, compartindo espazo con proxectos máis recentes como Montedapena e Michu da Rocha. No apartado folk aparecen tamén dúas propostas que están contribuíndo a expandir o son tradicional galego cara a novos lugares, como Abril e Alana.

Os premios Organistrum, centrados na difusión e infraestrutura musical, recoñecerán tamén o traballo de proxectos culturais e espazos fundamentais para a escena. Entre os finalistas aparecen iniciativas de comunicación como A Canle de Rodri Míguez, Galicia en Concierto ou Fogar dos Festivais, festivais como Surfing the Lérez, Festival Arteficiale Festival Alternativo Millo Verde e salas de referencia como Sala Capitol, La Fábrica de Chocolate e Krazzy Kray!

A partir deste 7 de maio abrirase a segunda fase de votación, na que público e persoas asociadas a Músicas ao Vivo poderán escoller os seus proxectos favoritos ata o 24 de maio. O resultado desa votación terá un peso do 50% na decisión final.

Máis alá do formato competitivo, os Premios Martín Códax da Música continúan funcionando como unha especie de mapa anual da creación musical galega. Un espazo onde conviven xeracións, escenas e linguaxes distintas, reflectindo unha realidade musical cada vez máis ampla e menos dependente dunha única etiqueta sonora.

Finalistas XIII Edición

Músicas Do Mundo e Mestizaxe

• Lidia India
• Abril Fado Atlántico
• Marta Vidal

Música Clásica e Música Contemporánea

• Alejo Amoedo
• María Mendoza
• Ensemble Allettamento

Jazz e Músicas Improvisadas

• Xan Campos «Amorodios»
• Manuel Cebrián-Punctum
• María Toro

Rock e Punk

• Broken Peach
• Stoned At Pompeii
• Loita Amada

Músicas Urbanas

• Hugo Guezeta
• Habló Pablo
• Lumedoloop

Pop e Indie

• Montedapena
• Nadadora
• Michu da Rocha

Metal e Heavy

• Talesien
• Urko
• Keepers

Electrónica

• Galician Army
• Kike Varela
• Løch

Música Infantil

• Paco Nogueiras
• Golfiños
• Ollo Piollo

Blues e Funk e Soul

• Allo Negro
• Sabela Cereijo
• Guilherme Zapata

Bandas de Música Popular

• Banda de Música Xuvenil de Torroso
• Banda de Música Municipal de Celanova
• Banda da Escola Municipal de Música de Oleiros

Orquestras e Grupos e Música De Verbena

• La Fórmula
• Orquestra Bravú Xangai
• Lamatumbá

Música Folk

• Guezos
• Abril
• Alana

Canción de Autor/a

• Sangre de Muerdago
• Antía Muíño
• Zeltia Irevire

Música Tradicional

• Donicelas
• Unto Vello
• Carapaus

Organistrum

Salas

• Sala Capitol
• La Fábrica de Chocolate Club
• Krazzy Kray!

Festivais

• Festival Arteficial
• Festival Alternativo Millo Verde
• Surfing The Lerez 2026

Web

• Fogar dos Festivais
• Galicia En Concierto
• A Canle de Rodri Míguez